Joh 4:43-54 | YomNWM | STEP | Bilumbu biodi biobi bu bivioka, Yesu wubotuka kuna, wuyenda ku Ngalili.

John 4:43-54

Kumu kimmuadi ku Ngalili

(Matayi 8.5-13 ; Luka 7.1-10)

43 Bilumbu biodi biobi bu bivioka, Yesu wubotuka kuna, wuyenda ku Ngalili. 44 Bila niandi veka Yesu wutelama kimbangi, bu kakamba ti : Mbikudi kasi nzitusu mu yandi tsi ko. 45 Bu katula ku Ngalili, basi Ngalili banyakula bu bamona bikumu biobi kavanga ku Yelusalemi mu thangu nyengo bila bawu mamvawu baba kuendanga ku nyengo.

46 Wuvutukila ku Kana, mu tsi Ngalili, kuna kakitudila nlangu vinu. Vayi kuba Pfumu yimosi yi leta, muisi Kafalinawumi, wuba ayi muanꞌandi wubakala wuba kimbevo 47 Bu kawa ti Yesu wubotukidi mu tsi Yuda ; buabu widi mu tsi Ngalili, buna wuyiza kunleba mu diambu kiza belusa muanꞌandi wubakala wuba nduka mu fua.

48 Yesu wunkamba :

—Enati lukadi mona bidimbu ayi bikumu buna lulendi wilukila ko e ?

49 Pfumu beni wunleba :

—Pfumu, tuenda nsualu tuamina muanꞌama kafua !

50 Yesu wumvutudila :

—Yenda kuaku, muanꞌaku wulembo zingi !

Mutu wuwilukila mambu mankamba Yesu, ayi, wuyenda kuandi.

51 Buna wukidi mu nzila, bisadi biandi biyiza kundengana, binkamba ti : “muanꞌaku wulembo zingi.”

52 Wuba yuvula kani thangu mbi muanꞌandi kamonina mbote. Bamvutudila :

—Zinzangala zimeni kibedi zono va thangu yitheti ku manima midi.

53 Dise dizaba ti yawu yina thangu Yesu kankambila ti : “Muanꞌaku wulembo zingi” Buna mutu beni va kimosi ayi batu boso baba mvuandanga ku nzoꞌandi bawilukila.

54 Kioki kumu kimmuadi kivanga Yesu bu kaba mu tsi Yuda mu kuenda ku Ngalili.